Wednesday, October 17, 2012

ആത്മക്കൂട്

അവസാനത്തേതെന്ന്
ഞാന്‍ വീണ്ടും വ്യാമോഹിക്കുന്ന
തീരുമാനം ഇതാ...

ഇനി നിങ്ങള്‍ക്ക്
കീറി മുറിച്ചു പരിശോധിക്കാന്‍
എന്റെ ആത്മാവിനെ ഞാന്‍
വിട്ടു തരികയില്ല

അതിനെ ഞാന്‍
സ്വര്‍ണയഴികളുള്ള
സ്വപ്നക്കൂട്ടിലൊളിപ്പിക്കും
അന്നം തേടി
അതിനി അലഞ്ഞു നടക്കയില്ല
അഴികള്‍ക്കിപ്പുറത്തു നിന്ന്
ഞാനതിന്‌
തേനും പാലും നല്‍കും

ആത്മാവ്
സുരക്ഷിതമായൊളിപ്പിച്ചതിനാല്‍
ഇനിയെനിക്ക്
ആകാശങ്ങളിലേക്ക് പറക്കാം
ആഴക്കടലിലേക്ക് ഊളിയിടാം
പര്‍വതങ്ങളോട് സൊറ പറഞ്ഞ്
താഴ്വരകളെ  തൊട്ടുരുമ്മി
പൊട്ടിച്ചിരിച്ച് പൊട്ടിക്കരഞ്ഞ്
സ്വസ്ഥമായൊഴുകാം
കാറ്റിനൊപ്പം വീശാം
മഴക്കൊപ്പം പെയ്യാം

എന്റേതായി യാതൊന്നും എവിടെയും
പൊഴിഞ്ഞു വീഴുകയില്ല
യാതൊന്നും എന്നിലേക്ക്
ചേര്‍ക്കപ്പെടുകയുമില്ല

അങ്ങനെ  ഞാന്‍
എന്റെ വിലങ്ങുകള്‍
ഉപേക്ഷിക്കാന്‍
പോവുകയാണ്
- Year 2002

No comments:

Post a Comment